ابنك بيسالك فين ربنا ؟؟ شكله ايه ؟؟

بسم الله الرحمن الرحيم 

الاطفال دائما لديهم اسئلة محرجة تضعنا في  حالة من الذهول ونجد هذا عند كل الاطفال ويعتبر مؤشر جيد وطبيعي علي مدي ادراكهم .
اولا : يجب عليكي ان تجاوبي علي اسئلتهم وان لا تتهربي او تقولي اشياء غير منطقية فيجب ان تعلمي جيدا ان الاسرة وخاصة الاب والام هي  مصدر المعرفة الاول لدي الطفل لا تتململي او تقولي بعدين .
جاوبيه وان لم تستطيعي ان تجاوبي بشكل من المنطق يمكن ان تستاذنيه انك سوف تردي لاحقا لانشغالك .
وقتها حددي جاوبك جيدا ونادي علي طفلك وافتحي معه الموضوع مرة اخري وجاوبيه واعتذري منه اولا علي تاخيرك وتعلمي  الا تتاخري كثيرا عليه حتي لا يذهب لغيرك فيبدا فيما بعد يستقي معلوماته من اقرانه وهم يكونوا مصدر معرفته ووقتها اؤكدلك انه سيخرجك من دائرته ولن تعرفي عنه شئ ابدا .
نذهب الي بعض التساؤلات التي نقع دائما فيها .

ماما هو ربنا فين ؟؟
في السما يا حبيبي ربنا عنده عرش كبير قالنا عليه وتقولي الاية ( الرحمن علي العرش استوي) 
طيب يا ماما شكله ايه  العرش ده ؟
كبير جدا جدا صعب انك تتخيله فربنا صعب حد يتخيله لان ربنا مفيش زيه حد هو اجمل واكبر واعظم من اي حاجة ممكن نفكر فيها .

ماما طيب هو عنده ايدين  ؟؟
اه يا حبيبي ربنا عنده ايدين بس مش زينا ومحدش فينا يعرف شكلها ايه علشان محدش شافه خالص ربنا نفسه قال عن نفسه (ليس كمثله شئ) فهو مش شبه اي حد فينا هو اللي خلقنا كلنا وعارفنا كلنا بس احنا منعرفش شكله ايه .

ماما هو ربنا بياكل ويشرب زينا ؟؟
انت الاول قولي انت بتاكل وتشرب ليه ؟؟ مش علشان تكبر وتبقي قوي .
ربنا بقي كبير وقوي مش محتاج لا ياكل ولا يشرب هو اللي خلق كل حاجة حوالينا فقوي جدا مش محتاج ياكل ويشرب علشان يبقي قوي .

ابنك بقي طفل ذكي ودؤوب ومتزعليش مني رخم ومصر يشوف ربنا كشئ محسوس حتعملي ايه ؟؟
حنرد بهدوء  ونقوله ان شاء الله يا حبيبي لو قدرنا نجمع حسنات كتير وربنا حبنا حنشوفه ان شاء الله بالاخرة لان رؤية ربنا ديه حاجة حلوة اوي مش اي حد ممكن يشوفوا ديه مكافاة جميلة ربنا خصصها لعباده المؤمنين اللي حبوه في الدنيا وعبدوه من غير ما يشوفوه .
كمان فيه حاجات بالدنيا كتيرة اوي بالدنيا عارفين انها موجودة من غير ما نشوفها زي الكهربا مثلا .

ماما يعني ايه موت ؟؟
هنا بقي لازم تقارني بين الحي والميت بمعني هنقوله اللي بيموت يا حبيبي مش بيتحرك ولا بيتنفس ولا بياكل ولا يشرب بزبط شبه اللي نايم اللي نايم بيصحي الميت لا بيفضل نايم لفترة طويلة عكس الحي بيتحرك وبيلعب وبياكل ويشرب .

ماما هو ليه لما جدو مات حطوه تحت التراب مطلعش ليه علي طول لربنا ؟؟
لان هو خلاص ربنا اخد منه الروح والروح ديه اللي بتخلينا نتحرك وعايشين فبيبقي الجسم خلاص مفيش حركة فبنضعه تحت التراب لحد ما يجي يوم القيامة ربنا يرجع الروح اللي طلعت عنده للجسم تاني ويشوف بقي هو جمع حسنات ولا جمع سيئات اللي جمع حسنات كتير ده بقي المؤمن ادعي جدو يكون حسناته كتير فيطلع فوق عند ربنا ويدخل الجنة انما لو بقي جمع سيئات ربنا بيدخله النار .

ماما هي الروح شكلها ايه ؟؟
الروح ديه حاجة ربنا خلقها زي ما خلق حاجات كتير هي اللي بتخلينا عايشين وبنتحرك وبناكل ونشرب لما بنموت اصل كلنا حنموت انا وانت وبابا وجدو كلنا كلنا الروح ديه بقي تطلع فوق عند ربنا وتفضل مستنية اليوم اللي كله حيموت فيه حيبقي اسمه يوم القيامة فربنا يقولها ارجعي للجسم بتاعك فترجع فيه اللي هو بقي جمع حسنات كتير حيدخل الجنة اللي بقي عنده سيئات وكان بيعمل حاجات وحشة كتير حيدخل النار .
انا بركز علي النقطة ديه لان لازم يعرف ان احنا ربنا خلقنا لهدف جمع الحسنات علشان ندخل الجنة ونبعد عن السيئات علشان مندخلش النار ويفهم فكرة ان الثواب والعقاب ممتدة معانا .

ودمتم سالمين والسلام ختام .